ايه هو الايلتس و ايه تكنيكات الامتحان ؟

البوست ده معمول للناس اللي عاوزة تعرف طرق المذاكرة للايلتس و ايه افضل الطرق انك تشتغل علي نفسك و تجيب درجة اعلي
لان فيه ناس بتذاكر فعلا .. بس مش بتجيب الدرجة المطلوبة ولا بتوصل للمستوي المطلوب ..

 سيب استفساراتك في كومنت هنا


الايلتس هو امتحان دولي مطلوب ف اغلب السفارات للهجرة او لسفر الدراسة و احيانا بيتطلب ف الشغل ف شركات مالتي ناشيونال ف مصر
مركز الامتحان هو البريتش كاونسيل و ليه فرع ف اسكندرية و فرعين ف مصر الجديدة و العجوزة و فرع ف طنطا
مركز IDP ف الجامعة الامريكية بالقاهرة و الاتنين مفيش فرق بينهم اي مركز هتمتحن فيه هو هو نفس الشهادة !

الامتحان من 4 فروع كل فرع من 9 درجات و ف الاخر بتجمع ال 4 فروع و تقسمهم علي 4 يطلعلك نتيجتك من 9 ال هي الدرجة النهائية .

سعر الامتحان : 2150 جنيه مصري

اولا انت ممكن تجرب مستواك عن طريق امتحان الايلتس التجريبي simulator في البريتش كاونسيل ب 200 جنيه بس - و بتعمل امتحان تجريبي بتعرف بيه الامتحان بيمشي ازاي و بتقيس مستواك - و تقدر تشوف مواعيده عن طريق موقع البريتش كاونسيل و الحجز ف المقر ف العجوزة

ثانيا اي حد بيفكر انه ياخد كورسات ف الانجلش او في الايلتس هي مضيعة للوقت .. لانك بتدرس بقي لك 20 سنة ف المدارسة القواعد و طرق الشرح التقليدية بالاضافة ان معظم الاماكن اللي بتتدرس انجلش ف مصر مستواها تحت الصفر .. و حتي لو مستوي كويس .. الافادة مش هتكون زي ما بتمارس اللغة او بتشتغل مع نفسك

ثالثا فيه ناس بتقول حل امتحانات ايلتس بتاعة كامبريدج و خلاص .. من غير شغل تاني و كدا هتجيب سكور .. ده كلام غلط خالص و مش صح و تمرينك عالامتحانات ده مش هيزود مستواك كتير .. هو مطلوب عشان تعرف تكنيك الحل وتتدرب عالامتحان لكن مش هيرفع مستواك بالدرجة الكبيرة

رابعا الماتيريال كتير و كل ما انت قاعد عالنت هتقابل ماتيريال .. موبايل ابلكيشن و كتب و مواقع .. عشان كدا احنا وفرنالكم افضل ماتيريال للايلتس تقدر تحصل عليها من هنا

اضغط هنا لماتيريال الايلتس

قبل ما تعملل اي حاجة لو انت متعرفش عن الايلتس كتير و متحاج كتاب نصايح و يمرنك و يعرفك علي اجزاء الامتحان عندك كتاب express IELTS و ده هيفيدك جدا لانه بيحط كل اجزاء الامتحان و نصايح ازاي تحل كل جزء ف مربع علي جنب و هو كتاب محترم جدا جزئين 

عشان ترفع مستواك بقي :

بالنسبة لل listening

- افضل شئ انك تتسلي بامتحانات كامبريدج ال 12 كتاب كل كتاب فيه 4 امتحانات .. بس انا شايف انه خد الكتب من اول 9 ل 12 لانهم الاحدث و الاقرب للامتحان الحالي .. الجزء التاني انك تشوف انت بتحب ايه تتفرج عليه ناشونال جيوغرافيك و لا افلام ولا اغاني انجلش ولا ايه .. ما عليك الا انك تفتح اليوتيوب و تتدور عاللي عاوز تسمعه و تستمتع متحطش ف دماغك انك بتذاكر .. انت بتتفرج علي حاجة بالانجلش و مستمتع بالبرنامج ال بتتفرج عليه و بتسمع و بتفهم و يفضل تتفرج علي حاجة يكون ال subtitle موجود فيها

بالنسبة لل Reading
- قبل ما تحل امتحانات هنا لازم الاول تتفرج علي طرق الحل و تكنيكات الحل لل reading - يعني فيه ناس بتبقي فاكرة انها هتدخل الامتحان تقري القطعة و تحل عليها و ده شبه مستحيل حتي لو انت Native .. لانها هتاخد وقت اكبر و هتنسي ال قريته .. ف لازم تبحث عن طريق الحل عن طريق ال scan و ال skim .. و دي شبه الطريقة ال كنا بنعملها ف امتحانات ثانوية عامة لما كنا مبنقراش القطعة و ندور عالاجابة جواه

الجزء التاني انك لازم تعرف vocabulary كتير - و مش اي كلمات .. الكلمات اللي تحس انها معقدة ف بعضها كدا - الكلمات دي هتلاقيها ف ابلكيشن جميل اسمه Vocabulary for IELTS و هتلاقيها ف كتاب تاني جميل جدا اسمها colins Vocabulary و عموما تحاول تقرا كتير مجلات او مواقع اخبارية بريطانية و اي كلمة جديدة تعرفها هات نوتة و حطها فيها و اكتب جنبها المعني و ف اخر كل يوم راجع علي النوتة دي من اولها لاخرها.

لازم تعرف الكلمات المركبة و اهمها زي look after - find out -pay off ..etc اعملهم ف نوتة خاصة بيك

بالنسبة لل Writing
برضه بغض النظر عن التمارين هنا وانك تمرن نفسك .. التمرين الكتير هنا مش مفيد .. بقدر ما انت لازم اول حاجة تعرف ازاي تكتب الموضوع بالشكل اللي طالبينه
عندك كتاب IELTS advantages for writing .. و موقع IELTS advantage نفسه مفيد جدا للكتابة .. و فيه خدمة تصحيح بفلوس ... وهنا ف صفحتنا بنعمل خدمة تصحيح ببلاش للكتابة من مدرس ايلتس قديم تقدر تبعت موضوعك هنا

الجزء التاني انك تعرف تستعمل ال conjugations كويس و علامات الترقيم و تستعمل كلمات في موضعها الصح و الاهم من دة انه تكتب جوا الموضوع اللي هما طالبينه و متخرجش عن الموضوع ال هما طالبينه و دي كانت اكتر حاجة بينهبوا عليها و حصلت معايا .. لان خروج الناس عن المواضيع و الرغي برا الموضوع اكتر حاجة بتنقص درجات ف القسم ده

بالنسبة لل speaking
القسم ده السهل الممتنع .. اسهل طريقة انك تظبط نفسك فيه انك تتكلم مع حد .. لو انت مش شغال ف مكان بالانجلش او حتي متعرفش ناس بتتكلم كويس
الطريقة الافضل و دي عن تجربة انك تسجل لنفسك .. تسجل لنفسك و تسمع لنفسك و تصحح لنفسك .. القسم ده سهل تجيب فيه درجات و اللكنة مش بتفرق معاهم .. اهم شئ تتكلم صح سواء جرامر او نطق كلمات او جمل ..

لو استعملت idioms في الامتحان يكون افضل و يديك درجات اعلي و دي تعبيرات عامية و متستعملهاش غير ف ال speaking بس و تقدر تلاقي عنها كتيبات كتير و فيديوهات ع موقعنا هنا .

متنساش انك طول ما انت بتذاكر ايلتس تحاول تستعمل الكلمات الاصعب و الاقوي .. انا عن نفسي عامل لستة اسمها other ways to say .. بتحط فيها الكلمة السهلة و طريقة انك تقولها بطريقة اقوي و احترافيه اكتر و اصعب ع سبيل المثال

like = desire ... different = distinctive ... bad=awful ...etc

و اي استفسارات تحت امركم و متنسوش لو حابين تحصلوا علي الكتب ..

كتب الايلتس من هنا

• شير للمقال للمنفعة العامة