اهم سؤال و جواب عن امتحان الايلتس ... هام جدا جدا

بسم الله الرحمن الرحيم 

الموضوع ده معمول عشان الناس اللي عاوزة تعرف اكتر بسهولة عن الايلتس اهم سوال و جواب عن الامتحان .. مهم جدا تقرأهم قبل ما تبدأ مذاكرة 

س : ايه هو الامتحان ببساطة ؟
ج : هو امتحان بيقيس مهاراتك في فروع اللغة المختلفة بتحتاجه الموسسات جوا و برا مصر لو عاوز تهاجر او تقدم علي جامعة برا - عبارة عن 4 فروع كل فرع من الامتحان الدرجة من 9 .. قراءة - استماع - كتابة - تحدث .. بتمتحن و النتيجة بتظهر بعد 13 يوم من الامتحان !


س : هل اعمل امتحان ايلتس اكاديمك ولا جينرال و لا ukvi ؟
ج : كل واحد و علي حسب انت هتقدم علي ايه ...اكاديمك ده للتقديم علي الجامعات برا .. جينرال للهجرة والشغل .. ukvi لانجلترا حاجات معينة بيتطلب


 س : سعر الامتحان و بيتعمل فين ؟
ج : الامتحان سعره 2150 و هيبقي 2600 شهر 5 ... بيتعمل ف البريتش كاونسيل المعهد البريطاني وله فروع كتير ف المحافظات و بيتعمل في مركز اسمه IDP تبع الجامعة الامريكية


س : هل فيه فرق بين البريتش كاونسيل و IDP ؟ ايه الاحسن ف الامتحان ؟
ج : لا مفيش .. و لو ان البريتش كاونسيل فيه افضليات لانه الاساس و المصححين اجانب متفهمين طبيعة الشخص ال ادامهم انه مش Native ... عكس IDP كل اللي شغالين مصريين بينقصوا جامد بسبب عقدهم النفسية

س : هل ينفع اعيد الامتحان لو مجبتش الدرجة ال عاوزها ؟
ج : تقدر تعمل اي عدد من الامتحانات ال انت عاوزه ..هتدفع نفس المبلغ تاني و تعيد الامتحان تاني


س : هل لو نقصت ف فرع جامد ممكن اعمل تظلم ؟
ج : ممكن تعمل تظلم ب مقابل مادي .. بس متعملوش الا لو يا دوب ناقصلك نص درجة بس .. لان ف الغالب مش بيزودوا عن كدا

س : هل انا محتاج اكون قوي ف الانجلش عشان ادخل الامتحان ؟
ج : الامتحان مش بقوة الانجلش ولا انك تكون كنت ف مدرسة لغات .. الاهم ف الايلتس انك تتمرن علي طريقة الحل .. لو وصلت لكدا هتجيب الدرجة ال عاوزها 


س : ايه اكتر نصيحة لجزء listening ف الامتحان ؟
ج : عشان تقوي نفس ف الاستماع بطريقة بسيطة جدا .. تاخد مجموعة من المحادثات الاكاديمية + محادثات حياة يومية من كتب الايلتس ال معاك و تحطها علي الموبايل و ببساطة تسمعها ف اي وقت حتي لو مش مركز ...ف مواصلات ..ف شغل .. مع الوقت مهارة الاستماع هتتقوي معاك ...لانك بتتعلم بالطريقة ال بيتعلم بيها طفل اللغة


س : ايه اكتر نصيحة لجزء ال Reading ف الامتحان ؟
ج : متقراش القطع ابدا .. اتعلم طريقة ال Scan و ال Scim بانك تعمل زي ما بنعمل ف ثانوي و تجيب من القطعة .. دي نصيحة البريتش كاونسيل و اي كتاب بيشرح ايلتس بيعلمك الطريقة دي لانك لو حتي بتتكلم انجلش مش هتلحق تقري ال 3 قطع


س : ايه اكتر نصيحة لجزء ال Writing ف الامتحان ؟
ج : حاول تكتب اكتر من موضوع و تتمرن علي الحل و متكتبش خارج الموضوع لان دي اكتر نقطة بتنقص الناس انها بتدخل ف جزء تاني من الموضوع عشان تزود الكتابة و تخرج من صلب الموضوع

س : ايه اكتر نصيحة لجزء ال Speaking ف الامتحان ؟
ج : اهم حاجة هو انك تسجل لنفسك ..تتكلم و تسجل نفسك علي الموبايل و تسمع لنفسك و تشوف غلطاتك بنفسك و تكرر ده كتير .. الطريقة دي هيكون ليها مفعول السحر معاك 

س : ايه احسن ماتيريال للايلتس ؟
ج : مفيش حاجة اسمها احسن ماتيريال .. كل الكتب تؤدي نفس الوظيفة الا انه لازم يكون ماتيريال متنوع و شامل شرح و كلمات و امتحانات كله مع بعضه تقدر تشوف الفيديو ده بخصوص الماتيريال

                         احصل علي ماتيريال الايلتس من هنا

• شير للمقال للمنفعة العامة